მამუკა ხელაიას კომპანიებმა ტენდერების 37%-ში უკონკურენტოდ ან კონკურენტთა დისკვალიფიკაციის ხარჯზე გაიმარჯვა

ლიზა ქორიძე

მამუკა ხელაიას კომპანიებმა ტენდერების 37%-ში უკონკურენტოდ ან კონკურენტთა დისკვალიფიკაციის ხარჯზე გაიმარჯვა.

44,650 ლარი მან ტენდერის გვერდის ავლით, გამარტივებული შესყიდვის გზით მიიღო, ხოლო უკვე ათვისებული 16 მილიონი ლარის გარდა, დამატებით 3 მილიონ ლარზე მეტი 2 მიმდინარე ტენდერიდან აქვს მისაღები.

2017-21 წლებში, ტენდერებში გამარჯვების შემდემ მამუკა ხელაიამ მმართველ პარტიას 55,000 ლარი შესწირა.

ბოლო, 10,000 ლარიანი შემოწირულობის გაკეთებიდან 3 დღეში, ის ქართული ოცნების რუსთავის საკრებულოს სიის მე-7 ნომერი გახდა.

არსებობს არაერთი კვლევა-გამოძიება, სადაც მკაფიოდ იკვეთება სქემა, რომლის მიხედვითაც, მეტწილად მორგებული პირობებით მოგებული ტენდერების შემდე, ბიზნესმენების მმართველ პარტიას ფულს სწირავენ და მათ საარჩევნო კამპანიას აფინანსებენ.

ჩანს, 2021 წლის ადგილობრივი თვითმმართველობის არჩევნებიც არ არის გამონაკლისი, თუმცა ამჯერად შეწირულობასთან ერთად პოლიტიკაში მოსვლისა და ქალაქების/მუნიციპალიტეტების მართვის ამბიციაც მკაფიოა. ერთ-ერთი ასეთი მაგალითია მსხვილი ბიზნესმენი რუსთავიდან, მამუკა ხელაია.

მამუკა ხელაია 14 კომპანიასთან არის დაკავშირებული, რომელთაგან ორი: შპს ვი-აი-პი + და შპს მ.კ.ბ-საქართველო, სახელმწიფო ტენდერებში აქტიურობს.

შპს ვი-აი-პი +, რომელიც 2013 წელს დაარსდა და რომლის 100% წილს მამუკა ხელაია ფლობს, სახელმწიფო შესყიდებში 2015 წლიდან აქტიურდება. ეს კომპანია სამშენებლო/სარეაბილიტაციო სამუშაოებს ახორციელებს, ხოლო მისი დამკვეთები სხვადასხვა სახელმწიფო და ადმინისტრაციული ორგანოებია. საერთო ჯამში, 2015-21 წლებში, ამ კომპანიამ 46 ტენდერში გაიმარჯვა, საიდანაც მან 16,684,645 ლარი უკვე მიიღო, ხოლო 3,047,000 ლარი მისაღები აქვს 2 ახლად მოგებული ტენდერიდან.

აღსანიშნავია რომ ტენდერების 37%-ში ამ კომპანიამ კონკურენტთა დისკვალიფიკაციის ან უკონკურენტო გარემოს ხარჯზე გაიმარჯვა.ასეთ პირობებში მოგებული ტენდერების ჯამურმა ღირებულებამ 3,640,948 ლარი შეადგინა.

საერთო ჯამში ამ კომპანიის მიერ მოგებულმა ტენდერებმა 2015-21 წლებში 19,731,645 ლარი შეადგინა, საიდანაც 16,684,645 ლარი უკვე მიიღო სახელმწიფოსგან, ხოლო 3,047,000 აქვს მისაღები 2 მიმდინარე ტენდერიდან.

რაც შეეხება შპს მ.კ.ბ-საქართველო-ს, რომლის 37%-ს მამუკა ხელაია ფლობს. ამ კომპანიამ 2015 წელს სსიპ სსსტც "დელტა"-გან მიიღო 7 გამარტივებული შესყიდვა, ჯამში 44,650 ლარის ღირებულების, რომელიც მას კომპანიას დელტას ბალანსზე არსებული სხვადასხვა ავტომობილებისა და სამხედრო ტექნიკის მოვლა-შენახვის მომსახურებისთვის გადაეცა.

საერთო ჯამში ამ ორი კომპანიით მან სახელმწიფოსგან უკვე მიიღო 16,729,295 ლარი, ხოლო 3,047,000 აქვს მისაღები 2 მიმდინარე ტენდერიდან.

მას შემდეგ რაც 2015 წლიდან მამუკა ხელაიას კომპანიებმა სახელმწიფოსგან დიდი რაოდენობით თანხების მიღება დაიწყეს ტენდერებისა და გამარტივებული შესყიდვების გზით, ბიზნესმენი მმართველი პარტიის მსხვილი შემომწირველიც გახდა, კერძოდ: 2017-21 წლებში მან მმართველ პარტიას ჯამში 55,000 ლარი შესწირა, მათ შორის ბოლო 10,000-ლარიანი შემოწირულობა მან 2021 წლის 6 აგვისტოს გააკეთა, ხოლო აქედან 3 დღეში იგი რუსთავის საკრებულოს პროპორციული სიის მე-7 ნომრად დასახელდა ქართული ოცნებიდან.

შეჯამება

ბიზნესმენ მამუკა ხელაიას შემთხვევა მმართველი პარტიისა და ბიზნესის შერწყმის კარგი მაგალითია, როცა ბიუჯეტის ხარჯზე ამ ორი სფეროს წარმომადგენელთა ვიწროპარტიული და პერსონალური ინტერესების დაკმაყოფილება, ნაცვლად გამჭირვალე და არაკორუფციულ გარემოში განხორციელებული სახელმწიფო შესყიდვებისა – ეკონომიურობისა და სამართლიანობის პრინციპის დაცვით.

წყარო:

შპს მ.კ.ბ-საქართველო - 416315990

შპს ვი-აი-პი + - 216429577

https://www.my.gov.ge/ka-ge/services/10/service/179

https://tenders.procurement.gov.ge/public/?lang=ge#

https://www.transparency.ge/.../entrepreneurial.../7483 - შემომწირველი

https://imedinews.ge/.../nino-latsabidzem-rustavis... - წარდგენა

 

რეგიონი გაფლანგულია წელი